Biografia

The smallest acts of kindness é o último traballo dunha das artistas máis innovadoras da escena electrónica internacional. Anne Clark posúe unha voz e un estilo inconfundíbel, mestura persoalísima de poesía e de música acústica e electrónica. A artista inglesa trata temas como a politización da espiritualidade ou o abuso mundial dos dereitos e dos recursos nesta nova proposta musical, unha das máis contundentes da súa carreira.

Anne Clark deuse a coñecer nos anos 80 cunha particular combinación de sons electrónicos e textos íntimos, coa que rastrexaba a esencia do universal. Pioneira do spoken word contemporáneo, a artista inglesa amosouse sempre aberta á experimentación sonora e empregou tanto a electrónica como instrumentos acústicos como o cello, o violin e o piano. A súa incansábel busca creativa deu froitos senlleiros como os temas “Sleeper in Metropolis” e “Our Darkness”, que hoxe en día son himnos da electrónica, ou o mítico álbum Just After Sunset (1997) no que experimenta con textos poéticos de Rilke.

The smallest acts of kindness é o e primeiro disco de estudio en 10 anos de Anne Clark. Acompañada por Murat Parlak, Niko Lai, Jeff Aug, Jann Michael Engel e Rainer von Vielen, a artista pioneira da vangarda europea sintetiza neste novo traballo as influencias acumuladas na súa longa carreira, ao tempo que busca novas formas de comunicarse co público. É un traballo moi coidado que ben paga tan longa espera, unha nova forma de fusionar a música acústica coa electrónica envolve os temas actuais que Anne Clark trata dende a complexidade propia das emocións humanas e dende a necesidade de ter esperanza, unha aposta creativa coa que se reafirma como a voz comprometida da vangarda musical europea